سلمان علی آغا بطور عام کھلاڑی پی ایس ایل میں شرکت سے لطف اندوز ہونے لگے، ان کے مطابق کراچی کنگز میں ڈیوڈ وارنر سے بہت کچھ سیکھنے کا موقع مل رہا ہے۔
’’ایکسپریس ڈیجیٹل‘‘ کو خصوصی انٹرویو میں انھوں نے کہا کہ بطور کپتان کھیلتے ہوئے جو اضافی ذمہ داری ہوتی ہے وہ پی ایس ایل میں نہیں ہے،ایسے میں آپ کو بہت کچھ ایسا کرنے کا موقع ملتا ہے جو کپتان کی حیثیت سے نہیں کر پاتے، میں اس سے انجوائے کر رہا ہوں۔
کراچی کنگز کے قائد ڈیوڈ وارنر کے بارے میں سلمان علی آغا نے کہا کہ انھوں نے انٹرنیشنل اور پھر فرنچائز کرکٹ میں بہت اچھا پرفارم کیا ،وہ لیجنڈ ہیں، ان سے مجھے بہت کچھ سیکھنے کا بھی موقع مل رہا ہے۔
انھوں نے کہا کہ کراچی کنگز کا ٹورنامنٹ میں بہت جلدی اچھا کمبی نیشن بن گیا، یہ کسی بھی ٹیم کیلیے بہت اہمیت کا حامل ہوتا ہے، ہم تو پہلے میچ سے ہی عمدہ پرفارم کر رہے ہیں، کوشش کریں گے اس سلسلے کو برقرار رکھیں۔
ایک سوال پر انھوں نے کہا کہ لاہور قلندرز سے سنسنی خیز میچ میں مجھے کبھی ایسا نہیں لگا کہ ہم ہدف حاصل نہیں کر پائیں گے،ہمارے پاس مضبوط بیٹنگ لائن موجود اور کئی ہارڈ ہٹرز کا ساتھ حاصل ہے، اسی لیے مقابلہ جیت بھی لیا۔
اپنی کارکردگی کے حوالے سے سلمان علی آغا نے کہا کہ میں نے پی ایس ایل کے پہلے میچ میں اچھا آغاز کیا لیکن اسے بڑی اننگز میں تبدیل نہیں کر پایا، ابھی تو ٹورنامنٹ ابتدائی مراحل میں ہے،میری فارم ٹھیک ہے لیکن بڑی اننگز نہیں کھیل پا رہا، کوشش کروں گا اگلے میچز میں زیادہ بہتر پرفارم کروں۔
انھوں نے کہا کہ آپ جس طرز کے قومی کپتان ہوں تو اسی کے میچز ہونے پر ضرور دیگر کھلاڑیوں کی کارکردگی پر نظر ہوتی ہے، میں جب بھی پی ایس ایل کے میچز دیکھوں تو چاہے بولر ہو یا بیٹر ہر کھلاڑی کی اچھی کارکردگی یا رویہ ضرور نظروں میں آتا ہے ۔
Source link
