کراچی میں طوفانی بارش، شہر بھر میں آندھی اور موسلادھار بارش سے نظام زندگی متاثر
وزیر اعلیٰ سندھ نے تمام متعلقہ اداروں کو ہائی الرٹ رہنے کی ہدایت جاری کر دی ہے
-
ویب ڈیسک -
کراچی شہر میں اچانک موسم نے کروٹ لے لی، جہاں مختلف علاقوں میں تیز ہواؤں اور آندھی کے ساتھ موسلادھار بارش نے شہری زندگی کو متاثر کر دیا۔
رپورٹس کے مطابق ناظم آباد، فیڈرل بی ایریا، گلشن اقبال، سپر ہائی وے، گلستانِ جوہر، سرجانی، بلدیہ، لیاقت آباد، حسن اسکوائر، سائٹ ایریا، منگھوپیر اور نارتھ کراچی سمیت کئی علاقوں میں شدید بارش ریکارڈ کی گئی۔
اس کے علاوہ صدر، شارع فیصل اور آئی آئی چندریگر روڈ پر بھی تیز بارش اور آندھی دیکھی گئی، جبکہ ڈیفنس اور کلفٹن کے علاقوں میں بھی بادل خوب برسے۔
صورتحال کے پیش نظر وزیر اعلیٰ سندھ سید مراد علی شاہ نے تمام متعلقہ اداروں کو ہائی الرٹ رہنے کی ہدایت جاری کر دی ہے۔
انہوں نے بلدیاتی اداروں، ڈی ایم سیز اور واٹر بورڈ کو فوری طور پر فیلڈ میں متحرک رہنے کا حکم دیا ہے تاکہ نکاسی آب کے مسائل سے نمٹا جا سکے۔
وزیراعلیٰ نے ٹریفک پولیس کو بھی بارش کے دوران ٹریفک کی روانی برقرار رکھنے کی ہدایات دی ہیں، جبکہ پی ڈی ایم اے کو ضلعی انتظامیہ کے ساتھ مکمل رابطہ اور تعاون یقینی بنانے کا کہا گیا ہے۔
حکام نے شہریوں کو خبردار کیا ہے کہ وہ بجلی کے کھمبوں اور لٹکتی تاروں سے دور رہیں اور غیر ضروری سفر سے گریز کریں تاکہ کسی بھی ناخوشگوار واقعے سے بچا جا سکے۔
