ایران کے سپریم لیڈر کے مشیر محمد مخبر نے آبنائے ہرمز پر کنٹرول کو ایٹم بم جیسی طاقت قرار دیا اور کہا کہ ایران کبھی بھی اس اہم اسٹریٹجک برتری سے دستبردار نہیں ہوگا۔
غیرملکی میڈیا کے مطابق محمد مخبر نے کہا کہ ایران نے طویل عرصے تک آبنائے ہرمز میں اپنی جغرافیائی اہمیت اور برتری کو نظر انداز کیے رکھا، تاہم اب تہران اس حیثیت کو اپنی بڑی طاقت سمجھتا ہے۔
انہوں نے کہا کہ آبنائے ہرمز دنیا کے اہم ترین بحری راستوں میں شامل ہے اور اس مقام پر کنٹرول ایسا اثر و رسوخ فراہم کرتا ہے جو عالمی معیشت کو متاثر کر سکتا ہے۔ محمد مخبر کے مطابق آبنائے ہرمز ایک ایسا موقع ہے جو ایٹم بم جتنا قیمتی ہے کیونکہ ایک فیصلے سے عالمی معیشت پر اثر ڈالا جا سکتا ہے۔
مشیرِ سپریم لیڈر نے مزید کہا کہ ایران حالیہ جنگ سے حاصل ہونے والے فوائد سے پیچھے نہیں ہٹے گا اور آبنائے ہرمز کے نظام میں تبدیلی لانے کے لیے اقدامات جاری رکھے گا۔ ان کا کہنا تھا کہ ایران یہ تبدیلی چاہے بین الاقوامی قوانین کے تحت کرے یا یکطرفہ طور پر، اپنی اسٹریٹجک پوزیشن برقرار رکھے گا۔
واضح رہے کہ آبنائے ہرمز خلیجی خطے کا نہایت اہم بحری راستہ ہے جہاں سے دنیا کی بڑی مقدار میں تیل اور گیس کی ترسیل ہوتی ہے، اسی وجہ سے اس خطے میں کشیدگی عالمی معیشت پر فوری اثرات مرتب کر سکتی ہے۔
