پیانگ یانگ:
شمالی کوریا نے واضح کردیا ہے کہ وہ جوہری ہتھیاروں کے عدم پھیلاؤ کے معاہدے (این پی ٹی) میں دوبارہ شامل ہونے کا کوئی ارادہ نہیں رکھتا۔
شمالی کوریا کے سرکاری میڈیا کے مطابق حکومت نے مؤقف اختیار کیا ہے کہ ملک اپنی دفاعی پالیسی اور ایٹمی پروگرام پر کسی بین الاقوامی دباؤ کو قبول نہیں کرے گا۔
سرکاری خبر رساں ادارے کی رپورٹ میں کہا گیا ہے کہ پیانگ یانگ خود کو این پی ٹی سے متعلق کسی بھی شرائط یا ذمہ داریوں کا پابند نہیں سمجھتا۔
اقوام متحدہ میں شمالی کوریا کے مستقل مندوب کم سونگ نے اپنے بیان میں امریکا اور اس کے اتحادی ممالک کو تنقید کا نشانہ بناتے ہوئے کہا کہ بعض طاقتیں اقوام متحدہ میں جاری این پی ٹی جائزہ اجلاس کو سیاسی مقاصد کے لیے استعمال کر رہی ہیں۔
انہوں نے کہا کہ شمالی کوریا کے جوہری پروگرام کو بار بار موضوع بنا کر عالمی ماحول میں کشیدگی پیدا کی جا رہی ہے جبکہ ایسے اقدامات خطے میں اعتماد سازی کے بجائے مزید تناؤ کو جنم دے رہے ہیں۔
یاد رہے کہ شمالی کوریا ماضی میں بھی متعدد بار اپنے جوہری پروگرام کو ملکی سلامتی کے لیے ناگزیر قرار دے چکا ہے، جبکہ امریکا اور مغربی ممالک اس پروگرام کو عالمی امن کے لیے خطرہ قرار دیتے ہیں۔
