بھائی کی دشمنی یا پرانی رنجش؟ لاہور میں 2 پولیس اہلکاروں کی شہادت کی وجہ سامنے آگئی
واقعے میں ملوث مرکزی ملزم کی شناخت ریحان بٹ کے نام سے ہوئی ہے۔
-
ویب ڈیسک -
لاہور کے علاقے بادامی باغ میں فائرنگ کے افسوسناک واقعے میں 2 پولیس اہلکار شہید ہوگئے۔ پولیس کے مطابق شہداء میں سب انسپکٹر عدیل اور ہیڈ کانسٹیبل اسد شامل ہیں جب کہ واقعے میں ملوث مرکزی ملزم کی شناخت ریحان بٹ کے نام سے ہوئی ہے۔
پولیس کے مطابق فائرنگ کا واقعہ تھانہ بادامی باغ کی حدود میں پیش آیا۔ شہید ہونے والے سب انسپکٹر عدیل اور ہیڈ کانسٹیبل اسد تھانہ لاری اڈا میں تعینات تھے اور فرض کی ادائیگی کے دوران نشانہ بنے۔
پولیس کا کہنا ہے کہ ابتدائی تحقیقات کے مطابق مرکزی ملزم ریحان بٹ نے اپنے تین نامعلوم ساتھیوں کے ہمراہ پولیس اہلکاروں پر فائرنگ کی۔ دیگر ملزمان کی شناخت اور گرفتاری کے لیے تحقیقات جاری ہیں۔
پولیس کے مطابق ریحان بٹ ایک خطرناک شوٹر اور قانون نافذ کرنے والے اداروں کو مطلوب ملزم ہے۔ ابتدائی معلومات کے مطابق اس نے اپنے بھائی کی دشمنی کے باعث سب انسپکٹر عدیل اور ہیڈ کانسٹیبل اسد کو نشانہ بنایا۔
پولیس کا یہ بھی کہنا ہے کہ شہید سب انسپکٹر عدیل نے کچھ عرصہ قبل ایک پولیس مقابلے میں خطرناک شوٹر فیضان بٹ کو ہلاک کیا تھا جو ریحان بٹ کا بھائی ہے۔
واقعے کی اطلاع ملتے ہی ڈی آئی جی آپریشنز فیصل کامران پولیس کی بھاری نفری کے ہمراہ موقع پر پہنچ گئے اور شواہد کا جائزہ لیا جب کہ ایس پی سٹی کو ملزمان کی فوری گرفتاری کا ٹاسک سونپ دیا گیا۔
پولیس کے مطابق مرکزی ملزم ریحان بٹ اور اس کے ساتھیوں کی گرفتاری کے لیے خصوصی ٹیمیں تشکیل دے دی گئی ہیں جب کہ مختلف مقامات پر چھاپہ مار کارروائیاں بھی جاری ہیں۔ حکام کا کہنا ہے کہ واقعے کے تمام پہلوؤں سے تحقیقات کی جارہی ہیں۔
ڈی آئی جی آپریشنز فیصل کامران نے پولیس اہلکاروں کی شہادت پر گہرے دکھ اور افسوس کا اظہار کرتے ہوئے کہا کہ شہداء نے فرض کی ادائیگی کے دوران جان کا نذرانہ پیش کیا۔
انہوں نے عزم ظاہر کیا کہ ملزمان کی گرفتاری تک چین سے نہیں بیٹھیں گے اور وہ جہاں بھی چھپیں، قانون کی گرفت سے نہیں بچ سکیں گے۔
ڈی آئی جی آپریشنز نے مزید کہا کہ شہداء کی قربانی رائیگاں نہیں جانے دی جائے گی اور شہداء کے خون کا حساب قانون کے مطابق لیا جائے گا۔
