ایران کی قومی فٹبال ٹیم کے کھلاڑیوں کو فیفا ورلڈ کپ 2026 سے قبل میکسیکو کے ویزے جاری کر دیے گئےجس کے بعد ٹیم کی تیاریوں میں حائل ایک اہم انتظامی رکاوٹ دور ہو گئی۔
ایرانی میڈیا رپورٹس کے مطابق میکسیکو کے سفارت خانے نے ترکیے کے دارالحکومت انقرہ میں موجود ایرانی کھلاڑیوں اور ٹیم آفیشلز کو ویزے جاری کیے۔ ایرانی اسکواڈ اس وقت ترکیے میں تربیتی کیمپ میں مصروف ہے۔
رپورٹس کے مطابق میکسیکو ورلڈ کپ کے دوران ایرانی ٹیم کا بیس کیمپ ہوگا جبکہ ایران کے گروپ مرحلے کے تینوں میچز امریکا میں کھیلے جائیں گے۔
ایرانی ٹیم 6 جون کو ترکیے سے میکسیکو روانہ ہوگی تاکہ عالمی ایونٹ کے لیے اپنی تیاریاں مکمل کر سکے۔
واضح رہے کہ ورلڈ کپ سے قبل ویزوں کا معاملہ ایران کے لیے ایک اہم مسئلہ بن گیا تھا، تاہم ویزوں کے اجرا کے بعد اس حوالے سے غیر یقینی صورتحال ختم ہو گئی۔
فیفا ورلڈ کپ 2026 کا انعقاد 11 جون سے 19 جولائی تک امریکا، کینیڈا اور میکسیکو میں مشترکہ طور پر کیا جائے گا۔
