بھارت: تیز رفتار ٹریلر کی ٹکر سے 5 پولیس اہلکار ہلاک، 3 شدید زخمی
حادثے میں زخمی ہونے والے تین اہلکاروں کو فوری طور پر قریبی اسپتال منتقل کر دیا گیا ہے
-
ویب ڈیسک -
بھارت کی ریاست اُڑیسہ کے ضلع جھارسوگوڈا میں پیش آنے والے افسوسناک ٹریفک حادثے میں پانچ پولیس اہلکار جان کی بازی ہار گئے جبکہ تین دیگر شدید زخمی ہو گئے۔
بھارتی میڈیا رپورٹس کے مطابق تیز رفتار ٹریلر مخالف سمت سے آتے ہوئے پولیس کی سرکاری گاڑی سے جا ٹکرایا۔ اہلکار ڈیوٹی پر موجود تھے کہ اچانک پیش آنے والے اس مہلک حادثے نے انہیں سنبھلنے کا موقع تک نہ دیا۔ تصادم اس قدر شدید تھا کہ پانچ اہلکار موقع پر ہی دم توڑ گئے۔
حادثے میں زخمی ہونے والے تین اہلکاروں کو فوری طور پر قریبی اسپتال منتقل کر دیا گیا ہے جہاں ان کی حالت تشویشناک بتائی جا رہی ہے۔
پولیس نے ٹریلر ڈرائیور کو حراست میں لے کر تفتیش شروع کر دی ہے، جبکہ حکام کا کہنا ہے کہ واقعے کی وجوہات جاننے کے لیے جامع تحقیقات کی جا رہی ہیں۔
