وائرل کلپ پر عمر سے متعلق قیاس آرائیوں کی حقیقت، حبا بخاری کا وضاحتی بیان
حبا بخاری اس وقت ملک کی نمایاں اداکاراؤں میں شمار ہوتی ہیں۔
-
ویب ڈیسک -
پاکستانی ڈرامہ انڈسٹری کی معروف اداکارہ حبا بخاری نے سوشل میڈیا پر گردش کرنے والے ایک پرانے کلپ سے جڑی عمر کی بحث پر خاموشی توڑتے ہوئے اصل حقیقت بیان کردی۔
حبا بخاری اس وقت ملک کی نمایاں اداکاراؤں میں شمار ہوتی ہیں۔ گزشتہ چند برسوں میں وہ کئی کامیاب ڈراموں کا حصہ رہ چکی ہیں۔
اداکار دانش تیمور کے ساتھ ان کی جوڑی کو شائقین بے حد پسند کرتے ہیں اور دونوں جلد نئے ڈرامے ہمراہی میں ایک بار پھر ایک ساتھ نظر آئیں گے۔
حال ہی میں وہ فیصل قریشی کی رمضان ٹرانسمیشن میں بطور مہمان شریک ہوئیں، جہاں انہوں نے ایک پرانے وائرل کلپ سے متعلق سوال کا جواب دیا۔
کچھ عرصہ قبل ایک میوزیکل نائٹ کا ویڈیو کلپ سوشل میڈیا پر وائرل ہوا تھا جس میں موجود ایک کم عمر لڑکی کو دیکھ کر صارفین حیران رہ گئے کیونکہ وہ شکل و صورت میں حبا بخاری سے کافی مشابہ دکھائی دیتی تھی۔
بعد ازاں سوشل میڈیا پر بحث چھڑ گئی کہ آیا وہ واقعی حبا بخاری تھیں یا ان کی ہم شکل۔ اداکارہ نے پروگرام میں وضاحت کرتے ہوئے بتایا کہ وہ کلپ درحقیقت انہی کا تھا۔
ان کے مطابق وہ اس وقت ساتویں یا آٹھویں جماعت میں زیر تعلیم تھیں اور یہ ویڈیو تقریباً 2011 کے دوران کی ہے۔ وہ اپنے اہل خانہ کے ساتھ اس شو میں گئی تھیں کیونکہ ان کے خاندان کا کوئی فرد سرکاری ٹی وی کے ٹیکنیکل ڈیپارٹمنٹ سے وابستہ تھا۔
حبا بخاری نے مزید بتایا کہ بچپن میں وہ اپنے گھر والوں کے ساتھ اکثر میوزیکل پروگرامز اور مشاعروں میں شرکت کیا کرتی تھیں۔
انہوں نے یہ بھی واضح کیا کہ وہ اپنی عمر ظاہر کرنے سے نہیں گھبراتیں اور اس حوالے سے پھیلنے والی قیاس آرائیوں میں کوئی حقیقت نہیں۔
