گزشتہ چند برسوں سے پاکستانی ٹی وی چینلز پر رمضان کے دوران اسپیشل ٹرانسمیشنز کے ساتھ خصوصی رمضان ڈرامے پیش کرنا معمول بن چکا ہے۔
ہر سال مختلف چینلز رمضان کے لیے ہلکے پھلکے، رومانوی اور مزاحیہ ڈرامے نشر کرتے ہیں جو ریٹنگ میں بھی اچھا مقام حاصل کرتے ہیں، ان پلیٹ فارمز سے کئی فنکار، جیسے فرحان سعید اور اقرا عزیز، کو بڑی مقبولیت حاصل ہوئی ہے۔
سال 2026 میں بھی کئی نئے رمضان ڈرامے نشر ہونے جارہے ہیں، جن کے ٹیزرز میں رنگا رنگ مناظر، رقص اور رومانوی لمحات دکھائے گئے ہیں۔
تاہم، سوشل میڈیا صارفین کی ایک بڑی تعداد نے اس رجحان پر تنقید شروع کردی ہے۔
صارفین کا کہنا ہے کہ رمضان جیسے مقدس مہینے میں نشر ہونے والے پروگراموں کا محور عبادت، اخلاقیات اور مثبت پیغام ہونا چاہیے جبکہ موجودہ ڈراموں میں موسیقی، رقص اور غیر سنجیدہ کہانیاں زیادہ دکھائی جارہی ہیں۔
کئی صارفین نے تنقید کرتے ہوئے کہا کہ یہ ڈرامے رمضان کی اصل روح سے مطابقت نہیں رکھتے اور نامناسب تعلقات کو عام کرنے کا پیغام دیتے ہیں۔
کچھ صارفین نے اپیل کی کہ ناظرین ایسے پروگراموں کو ریٹنگ دے کر فروغ نہ دیں جبکہ دیگر نے کہا کہ اگر عوام دیکھنا بند کردیں تو چینلز خود بخود مواد میں تبدیلی کریں گے۔
